Farfall

                                           (dialetto milanese)

L'è bell sta chì quacciaa in sul cossin
de lana moresina
de sta cà, la mia cà.
Ormai conossi tutt i sò canton
qui fresch d'estàà
e qui bei cald d'inverno.
La mia padrona l'è tutta basitt
e carezz e morgninn.
In scoss a lee quasi hoo desmentegaa
la tetta tevedina de mia mama.
Ona galla de seda, l'oss de gomma,
tanti farfall de carta per giugà
e bocconitt speciai.

E qui bei passeggiad giò per i bosch
cont el profumm de legor e niasc,
corr ‘dree ai lusert e scondess sott i sces
pien de avi e scigad e de farfall ...

De on poo de temp però vemm minga in gir
inscì de spess, ma fa l'istess
stoo tanto ben anca chì a pisoccà ...
Me dà fastidi on cicinin domà
quell odor de tabacch, de sigaretta
in sui calzon d'on scior che mì hoo mai vist,
Settaa in su la poltrona del salott
el parla, el parla ...
Lee tutta infolarmada lì a scoltall ...
El me carezza mai. El gh'ha paura.
‘Vegh paura de mì ..! On bombason
ch'el gh'ha el mond per amis,
nanca ona oreggia moeuvi, nè on barbis
per cascià via i moscon
che gira intorna ...

Anca l'odor de pell el me pias nò,
La pell de qui valis 'vert in sul lett ...

Ona bella giornata, meno mal,
la macchina l'è pronta, se va a spass
come ai bei temp!

Ma ... perché ... la me lassa giò chì,
in su l'autostrada ...
zin, zan
in mezz ai macchin ...
zin, zan
e poeu el scotta l'asfalt ...
zin zan
e vedi nò la fin de questa strada ...
zin, zan
domà ona gibigianna de farfall ...
zin, zan
com'el scotta l'asfalt,
Dio com'el scò ...

Francesca Giussani Ornago

GLOSSARIO

quacciaa: accucciato
scoss: grembo
tevedina: tiepida
legor: lepri
niasc: uccello implume
infolarmada: eccitata
bombason: tenerone
lusert: lucertole
avi: api
scigad: cicale